ລາວ-ເກົາຫລີເຊັນ MOU ແລກປ່ຽນເຕັກນິກການລ້ຽງງົວ ເປີດທົດລອງນຳເຂົ້າຊີ້ນງົວຮັນອູຄຸນນະພາບສູງ
ວຽງຈັນ, 24 ກໍລະກົດ 2025 - ສະມາຄົມທຸລະກິດກະສິກຳລາວ (LABA) ແລະ ສະມາຄົມງົວຮັນອູແຫ່ງຊາດເກົາຫລີ ໄດ້ເຊັນບົດບັນທຶກຄວາມເຂົ້າໃຈ (MOU) ເພື່ອແລກປ່ຽນເຕັກນິກການລ້ຽງງົວ ພ້ອມເປີດການທົດລອງນຳເຂົ້າຊີ້ນງົວຮັນອູຄຸນນະພາບສູງຈາກເກົາຫລີ.
ພິທີເຊັນສັນຍາຈັດຂຶ້ນທີ່ໂຮງແຮມອາມາຣີ ວຽງຈັນ ໂດຍມີ ຫົວໜ້າຫ້ອງການ ກະຊວງກະສິກຳແລະສິ່ງແວດລ້ອມ, ເອກອັກຄະລັດຖະທູດເກົາຫລີໃຕ້ປະຈຳລາວ ແລະ ຜູ້ແທນຈາກທັງສອງຝ່າຍເຂົ້າຮ່ວມ ງານນີ້ ຜູ້ອຳນວຍການ ບໍລິສັດ ພິນິມໂປຣ ຈຳກັດ ກໍໄດ້ເຂົ້າຮ່ວມໃນນາມຄະນະບໍລິຫານ ສະມາຄົມ ທຸລະກິດ ກະສິກຳລາວ.
ທ່ານຄຳຫລ້າ ແສງດາວົງ, ຮອງປະທານສະມາຄົມທຸລະກິດກະສິກຳລາວ, ໄດ້ກ່າວເຖິງຈຸດປະສົງສຳຄັນ 3 ປະການ:
1. ການແລກປ່ຽນເຕັກໂນໂລຊີ
- ຖ່າຍທອດເຕັກນິກການລ້ຽງງົວທັນສະໄໝຈາກເກົາຫລີ
- ເຕັກນິກການໃຫ້ອາຫານງົວ, ການປ້ອງກັນພະຍາດ
- ການຕັດແຕ່ງຊີ້ນງົວ ແລະ ການປຸງແຕ່ງຜະລິດຕະພັນ
2. ການທົດລອງນຳເຂົ້າຊີ້ນງົວຄຸນນະພາບສູງ
- ຮອງຮັບຄວາມຕ້ອງການຂອງນັກທ່ອງທ່ຽວເກົາຫລີ ແລະ ຕ່າງປະເທດ
- ສ້າງທາງເລືອກທີ່ຫຼາກຫຼາຍໃຫ້ກັບຜູ້ບໍລິໂພກ
3. ການສ້າງຄວາມປອດໄພທາງອາຫານ
- ແລກປ່ຽນຄວາມຮູ້ດ້ານຂະບວນການໂພສະນາການ
- ເສີມສ້າງມາດຕະຖານຄຸນນະພາບສາກົນ
ຕາມການສຳຫຼວດ, ປະເທດລາວມີນັກທ່ອງທ່ຽວເຂົ້າມາທ່ອງທ່ຽວປະມານ 4.12 ລ້ານຄົນຕໍ່ປີ ໃນນັ້ນມີນັກທ່ອງທ່ຽວຈາກເກົາຫລີໃຕ້ປະມານ 173,000 ຄົນ ຄິດເປັນ 4.2% ຂອງຈຳນວນທັງໝົດ ແລະ ມີແນວໂນ້ມເພີ້ມຂຶ້ນຢ່າງຕໍ່ເນື່ອງ.
ການເພີ້ມຂຶ້ນຂອງນັກທ່ອງທ່ຽວເກົາຫລີ ພ້ອມດ້ວຍຄວາມຕ້ອງການຂອງໂຮງແຮມ, ຮ້ານອາຫານ ແລະ ຊາວເກົາຫລີທີ່ມາອາໄສຢູ່ໃນລາວ ສ້າງໂອກາດທາງທຸລະກິດໃໝ່ສຳລັບການນຳເຂົ້າຊີ້ນງົວຄຸນນະພາບສູງ.
ສະມາຄົມງົວຮັນອູເກົາຫລີ ຈະ:
- ສະໜອງເຕັກນິກແລະເຕັກໂນໂລຊີການລ້ຽງງົວ
- ຖ່າຍທອດຄວາມຮູ້ການລ້ຽງງົວຄຸນນະພາບສູງ
- ສະໜອງຜະລິດຕະພັນຊີ້ນງົວຮັນອູ
ສະມາຄົມທຸລະກິດກະສິກຳລາວ ຈະ:
- ຈັດສັນສະຖານທີ່ແລະສະມາຊິກເພື່ອຮັບການຖ່າຍທອດຄວາມຮູ້
- ດໍາເນີນການຂໍອະນຸຍາດນຳເຂົ້າແລະຈຳໜ່າຍສິນຄ້າ
- ຈັດຫາສາງເຢັນເພື່ອເກັບມ້ຽນສິນຄ້າ
ແນວທາງພັດທະນາໄລຍະຍາວ
MOU ມີອາຍຸ 2 ປີ ແລະ ສາມາດຂະຫຍາຍອີກ 2 ປີ ໂດຍອັດຕະໂນມັດ. ເປົ້າໝາຍໄລຍະຍາວແມ່ນພັດທະນາການລ້ຽງງົວລາວໃຫ້ກາຍເປັນສິນຄ້າສົ່ງອອກໄປຕ່າງປະເທດ ເຊິ່ງສອດຄ່ອງກັບນະໂຍບາຍການສົ່ງເສີມການຜະລິດພາຍໃນຂອງລັດຖະບານລາວ.
ກ່ອນຫນ້າພິທີເຊັນສັນຍາ, ຄະນະຜູ້ຊ່ຽວຊານຈາກເກົາຫລີໃຕ້ໄດ້ລົງຢ້ຽມຢາມຟາມລ້ຽງງົວແລະໂຮງງານປຸງແຕ່ງຊີ້ນງົວໃນລາວ ເພື່ອສຶກສາສະພາບການລ້ຽງແລະການແປຮູບຊີ້ນງົວ ກ່ອນວາງແຜນການຮ່ວມມືໃນອະນາຄົດ.
